Tîm Cyflenwi De Cymru
Mae partneriaid yn datrys problemau yn gydweithredol er mwyn sicrhau bod pobl fregus yn cael yr help sydd ei angen arnynt, ac wrth wneud hynny, yn lleihau'r galw y gellir ei ragweld ac y gellir ei ‘atal’.
Mae'r Rhaglen genedlaethol Camau Cynnar gyda'n Gilydd yn cyfrannu tuag at uchelgais ehangach cenedlaethau’r dyfodol i leihau Profiadau Niweidiol mewn Plentyndod yng Nghymru. Fel rhan o'r uchelgais honno, mae rhaglen de Cymru yn canolbwyntio ar greu ‘system’ cyswllt cyntaf i ymyrryd, sy'n ymateb i fregusrwydd yn wahanol i'r ‘system’ bresennol oherwydd:
1. Mae partneriaid yn deall y berthynas negyddol rhwng adfyd, trawma a bregusrwydd ym mywydau pobl.
2. Mae partneriaid yn cytuno i weithio i bwrpas cyffredin a dylunio ac unioni arferion, prosesau, gweithdrefnau a pholisïau strategol a gweithredol i gyflawni'r diben hwnnw.
3. Wrth weithio tuag at bwrpas a rennir, mae partneriaid yn deall yr hyn y mae pawb yn ei wneud ar wahân a'r hyn y maent yn ei wneud gyda'i gilydd wrth ddiwallu anghenion pobl fregus.
4. Ar y ‘cyswllt cyntaf ’, mae gweithwyr proffesiynol yn ceisio deall anghenion pobl fregus a datrys problemau er mwyn cyfeirio, cefnogi neu ddiogelu.
5. Caiff pobl fregus eu cysylltu â'r cymorth sydd ei angen arnynt yn ôl y llwybr cyflymaf a byrraf.
6. Ar bob cyswllt, cesglir gwybodaeth ‘digon da’ fel y gall gweithwyr proffesiynol eraill wneud penderfyniadau ‘da’ wedi eu hysbysu gan wybodaeth i gyfeirio, cefnogi neu ddiogelu ar y llwybr cyflymaf.
7. Mae'r gweithlu wedi'i hyfforddi a’i gefnogi ac mae'n hyderus wrth ddeall sut i ymgysylltu a datrys problemau i gynorthwyo a chefnogi pobl fregus sydd mewn angen neu argyfwng.
8. Mae partneriaid yn parhau i wella'r ‘system’ cyswllt cyntaf i ymyrraeth a rennir i ymateb i alw am fregusrwydd rhagweladwy.
Y tîm
Chris Truscott, Uwch-arolygydd
Ymunodd Chris â Heddlu De Cymru ym mis Ionawr 1999 fel swyddog ymateb ar gyfer ardaloedd Porthcawl a Phen-y-bont am chwe blynedd cyn cael ei ddyrchafu'n Rhingyll yn cwmpasu rolau ymateb a phlismona lleol yn ardal Maesteg Pen-y-bont.
Yn 2011 ymunodd Chris â thîm swyddogion staff ym Mhencadlys yr Heddlu yn gweithio i Brif Swyddogion ac arweiniodd ar brosiect adolygu ledled yr heddlu ar y cyd â rhanbarth y Gogledd Orllewin.
Yn 2012, ymunodd Chris â chynllun Cenedlaethol Datblygu Potensial Uchel, lle y cwblhaodd ddiploma ôl-raddedig ac yna MSc mewn Arweinyddiaeth a Rheolaeth yr Heddlu ym Mhrifysgol Warwick.
Yn 2013, cafodd Chris ei ddyrchafu i reng Arolygydd gan ymgymryd â rôl rheolwr digwyddiadau’r heddlu a rheolwr arfau tactegol yn yr ystafell reoli.
Yn 2014, arweiniodd Chris adolygiad o adnoddau a galw yn yr ystafell reoli gan arwain at greu model adnoddau sy'n seiliedig ar alw a oedd yn lleihau costau gweithredu yn sylweddol tra’n cyflawni lefelau uchel o berfformiad.
Yn 2015, cafodd Chris ei ddyrchafu i rôl Prif Arolygydd a'i leoli yng Nghanol Dinas Abertawe fel Pennaeth Gweithrediadau ac yna Pennaeth Cymunedau a Phartneriaethau Abertawe a Chastell-nedd Port Talbot. Ym mis Chwefror 2018, cafodd Chris ei ddyrchafu'n Uwch-arolygydd dros dro i arwain Rhaglen Camau Cynnar gyda’n Gilydd De Cymru, i drawsnewid y ffordd y mae plismona yn delio â bregusrwydd trwy ymyrraeth gynnar ac atal achosion gwreiddiol.
Shaun Kelly, Arweinydd y Bartneriaeth
Shaun yw Arweinydd Partneriaeth ar gyfer E.A.T. De Cymru. Chwaraeodd Shaun ran annatod yn y gwaith o ddatblygu prosiect dull wedi ei hysbysu gan ACE i Blismona Bregusrwydd a ariennir gan Gronfa Arloesedd yr Heddlu, a ddarparodd lawer o'r dystiolaeth ar gyfer rhaglen genedlaethol Camau Cynnar gyda'n Gilydd.
Mae Shaun wedi cael gyrfa helaeth mewn Gwasanaethau Plant yn ne Cymru, yn gweithio fel rheolwr strategol a gweithredol yn y sectorau statudol, annibynnol a thrydydd sector ac fel datblygwr gwasanaeth ar nifer o ddulliau arloesol.
Mae Shaun wedi gweithio fel Uwch-ddarlithydd mewn addysg a hyfforddiant Gwaith Cymdeithasol ym meysydd amddiffyn plant, gweithio aml-asiantaeth, cam-drin domestig, gwasanaethau i blant sy'n derbyn gofal, datblygu gwasanaethau a newid sefydliadol.
Bronwyn Churches, Cymorth Prosiect
Cwblhaodd Bronwyn ei hyfforddiant MRN ym 1994 gan ennill App B Sci (Anableddau Deallusol) o Brifysgol Deakin ym Melbourne Awstralia.
Mae Bronwyn yn weithiwr gweinyddu profiadol gyda chefndir o weithio mewn amrywiaeth o sectorau gan gynnwys Llywodraeth, Addysg Uwch, y trydydd sector a diwydiant preifat yn Awstralia a'r DU.
Mae gan Bronwyn hefyd Faglor mewn Gwyddoniaeth (BSc) sy'n canolbwyntio ar Seicoleg Gymhwysol o Brifysgol De Cymru ac mae wedi cwblhau NVQ3 a Phrentisiaeth mewn Busnes a Gweinyddu.
Debbie Davies, Rheolwr Prosiect
Ymunodd Debbie â Heddlu De Cymru yn 1997 yn y Biwro Cofnodi Troseddau cyn symud ymlaen i rôl clerc Ymchwiliad Gorsaf yng Ngorsafoedd Heddlu Pen-y-bont a Maesteg.
Yn 2004 aeth Debbie ymlaen i ymuno â'r tîm Hyfforddiant TG Dysgu a Datblygu lle cwblhaodd ei Thystysgrif Addysg. Ar ôl nifer o flynyddoedd gyda'r tîm LDS, ymunodd Debbie â thîm Cynllunio'r Heddlu a daeth yn rhan o gynllunio digwyddiadau mawr a lleol.
Mae Debbie wedi gweithio mewn nifer o rolau cymorth rheng flaen cyn ymwneud â nifer o brosiectau mawr, yn bennaf o ran gweithredu systemau TG, cyn ymuno â Rhaglen Camau Cynnar gyda’n Gilydd De Cymru fel rheolwr prosiect ym mis Awst 2018.